今日心情唔係幾好, 工作上出左d問題, 俾人炳.....唉, 我下午請左假番屋企渙bb, 收到公司電話後, 心情即刻down晒, 或者係我eq低, 將工作的情緒帶左番屋企.
想在fb/msn搵人傾下計發洩下, 但可惜冇合適人選, 唯有暫時鬱喺心裏.
新的一天, 希望有新的開始.
不經不覺我個仔差唔多1歲半啦, 好想記錄下佢而家的情況.
體重: 大約25磅 (90%生長線, 屬大碼)
身高: 約84cm (over 97%生長線, 屬加大碼)
但當身高同體重一齊比較時, 就會睇到境襄呢個高度只有呢體重, 原來係偏輕, 只屬於10-25%生長線! 出世頭幾個月佢真係算大份, 不過而家個人拉長左, 反而一d都唔叫肥lu, 我覺得size適中. 可能因為偏高, 所以好多街外人都以為境襄已有兩歲!
牙仔: 當境襄10.5個月時出左上4隻下3隻後, 事隔大半年都冇左出過牙仔, 但呢兩日發現境襄上面左右分別開始再出牙仔啦, 但唔知點解下面依然得3隻單數咁奇怪呢? 境襄d牙超大隻, 希望唔會唔夠位生啦!
頭髮: 到而家未剪過, 呵呵呵~ 其實比出世長左好多架啦, 側邊d頭髮已蓋過少少耳仔, 但整體都依然係咁"濃密"!
飲食: 一日大約食三餐粥, 一至兩次奶粉 (婆婆湊時), 晚上我放工後至第二朝依然人奶. 冇錯, 我依然繼續餵緊. 目標1年全人奶已完成, 喺bb 14.5個月開始, 我俾左佢第一次奶粉, 其實內心都有爭扎, 因其實我仲可以餵到人奶, 不過我已覺得日日番工泵奶好累, 好想休息啦. 到16個月時先真正stop左公司泵奶, 但平時只要bb同我一齊而佢須要飲奶, 我就繼續餵人奶.
究竟幾時先stop人奶? 未知...因為境襄到而家晚晚仲要飲幾次夜奶, 講真我梗係好累啦, 由6個月開始到而家18個月, 冇一晚可以一教瞓天光. 試過唔俾佢飲, 佢真係同你喊到你俾為止. 喊到第二朝聲都沙左, 就係咁真係唔忍心, 就每晚繼續餵餵餵.
睡眠: 大約晚上9:30-10:00左右瞓, 到第二朝8點幾醒, 下午只小睡一次, 通常個幾鐘就醒, 有時都會瞓足2個幾鐘.
動作: 12個月開始識行路, 而家開始識跑跑地, 但都仲有d驚佢會仆親.
性格: 喺屋企係一個小霸王, 勁多野講, 又識發脾氣, 而家當有唔順佢意時, 如唔俾佢想要的東西時, 佢就會即刻喺到自轉扭計大喊, 之後仲衰到自殘, 打自己個頭! 真係吹漲! 都唔可以縱佢, 第時仲難教! 喺屋企係勁度活潑頑皮, 但一見到陌生人即刻好怕醜, 又唔出聲, 頭側側挨著我膊頭, 叫佢叫叔叔姨姨byebye都唔肯, 上playgroup仲驚到大喊! 但陌生人一走, 就叔叔姨姨byebye咁叫, 又係吹漲! 真係屋內街外兩個人, 希望大d冇咁怕醜啦!
說話: 境襄識講好多野啦, 媽媽, 爸爸, 冬冬(公公), 婆婆, 爺爺, 麻麻, 姨姨, 阿父(舅父), 火車, 巴士, 電梯, 落地地, 去街街, 著鞋鞋/襪襪, ab song (abc song), baa baa jip (baa baa black sheep)....太多太多, 數唔盡. 佢成日跟人口水尾講野, 人地講野, 佢即刻會跟住講, 當然唔係成句句子, 講說話進度幾好, 有時d新字佢跟完講下次就記得係乜, 發達能力強左好多, 我地都聽得明佢講乜野, 不過有時d bb話就好搞笑, 都唔知佢講緊乜.
意識: 已經有意識咁諗野同聽野, 如見到電梯識講"電梯", 見到架火車走緊, 就話火車走左/火車byebye, 有意識分物件大同細, 高唔高, 有同無, 同埋多同少. 見到人多, 會話好多人; 如果件物件冇左, 會話無同攤開手板; 叫佢放好對鞋, 識得放喺原位; 識得認晒屋企人, 識得話凍....等等
痴身度: 依然最痴婆婆, 跟住我同爸爸.
(閱讀全文)突然心血來潮睇番自己個blog, 好耐冇寫lu...不如等我而家寫下bb一歲成長日記先!
2009年9月4日一歲啦! 我買左個好靚的蛋糕慶祝bb一歲生日, 呢晚就叫左pizza同kfc同屋企人一齊慶祝, 睇下, 個蛋糕係咪好靚呢!!
生日願望好簡單, 希望bb身體健康...當然仲希望佢將來都開開心心, 出入平安, 聽教聽話, 唔好學壞, 精乖靈利...(下刪一百字)
好啦, 究竟境襄而家一歲識d乜呢?!
體重: 約24磅左右 (12號去健康院, 到時再update正確數字)
身高: 約80cm
牙仔: 7個半月出第一隻下門牙, 9個月出第2隻下門牙, 之後好快再出第一隻上門牙. 我諗約10個幾月左右出埋第2隻上門牙同第3隻下門牙. 一共出左5隻後到而家都冇進展啦.
頭髮: 依然好似Q太朗咁多頭髮. 我d fd個b已經剪過幾次頭髮, 但我家襄兒到而家一歲依然保持清爽, 堅持慢增長, 距離剪頭髮既路仲有一大段囉!
行路: 約10個月左右就開始成日想行路, 但完全企唔穩, 所以我地嗰時成日要雙手捉住bb隔肋底扶佢行, 最辛苦嗰段時間, 真係腰酸背痛. 到11個半月時已行得穩好多, 只需拖住bb一隻手就可以了. 同時, bb呢刻都開始可以唔駛人扶自己企幾秒. 到而家已可以自行行幾步了! 估計13個月前應該可以自己行!
動作: 識拜拜 (但識左之後就唔肯再做呢個動作, 玩性格...), 識請請, 而家係狂請請, 但多數雙手唔係合埋, 係兩隻手一齊上下狂擺動, 勁做呢個動作! 開始識拍手同飛吻, 但飛吻會變左食手指...
說話: 約8個月定9個月識叫baba mama, 但堅持唔肯叫公公婆婆等人....而家狂講bb話, 如da ba da ba dad, 打de (勁似叫daddy)....仲有乜呢...唔記得添.
認人: 唔知幾時開始識認, 總之而家問bb公公呢? 婆婆呢? 姨姨呢? 舅父呢等等, 都識得即刻望向有關人士.
痴身度: 最痴婆婆, 一見婆婆就即刻撲埋去. 第二先係我呢個阿媽 >_<. 第三個爸爸.
食物: 一歲啦, 依然飲媽媽奶, 我終於完成我的目標! 好開心! 往後會點未知....或許順其自然啦. 其餘就主要食粥仔, 糊仔等.
暫時諗到咁多啦....諗到多d再update!
(閱讀全文)復活節第1日朝早6點幾境襄無端端發燒, 唔敢怠慢拿拿聲換衫帶佢去仁安睇醫生, 好地地唔知做乜無端端發燒, 又冇乜其他病徵, 去到醫生話作感冒, 番到屋企開始都有幾聲咳, 之後仲流埋鼻水添! 仲諗住復活節幾日假期帶bb出去玩下, 最後當然冇得去啦, 只係最後一日假期見bb好番d先帶bb去馬鞍山行下咋.
雖然病左, 不過境襄都算幾精神, 食得玩得, 只係間中都會特別扭下計, 要貼退熱貼啦~
我呢個渣豆媽媽真係渣, 竟然俾bb傳染番, 復活節後第一日番工開始發燒, 第2日就請假係屋企休息下, 休息一日以為冇事咪第二日再番工囉, 點知番工嗰日下午就再度發燒啦, 又要再休息過, 如是者以為冇事咪星期六番長週囉, 我真係身子弱(但又唔係財多嗰隻), 星期日第三度發燒, 好辛苦, 再加上勁咳兼狂流鼻涕, 非常辛苦, 從未試過病咁耐兼番兜發足成個星期燒.
(閱讀全文)
好耐好耐冇寫blog啦~有左bb真係好忙, 境襄而家已經7個月1星期啦, 當初湊bb真係好辛苦, 而家雖然比當初舒服左好多, 但真係冇晒私人時間囉!
好, 首先報告一下境襄的生長情況先:
體重: 而家約20磅左右啦, 喺6個月時健康院度到19磅, 生長線大約在90線左右, 唔錯幾好! keep住落去呀! 媽媽之前番工日日抱住境襄去婆婆屋企, 好早已經抱到勁辛苦, 終於喺6個月左右要用車仔啦, 舒服晒~
身長: 6個月度時有74cm長, 係over左97線, 即係100個bb裏境襄係最高嗰三兩個! 睇黎係遺傳左爸爸媽媽既高度啦, 第時會唔會有6呎高呢?! 
主餐: 而家都係食媽媽奶為主, 冇食奶粉, 如果有睇開我之前的blog, 就知道我當初的人奶辛酸史, 時間証明我的努力同堅持係冇白費的! 好多人成日問我餵到幾時, 我答目標係1歲, 1歲後就到時先算了, 個個聽完都話我勁咁有恆心, 其實飯唔識煮的我, 湊仔都麻麻地識的我, 只係俾到我有既奶俾bb, 並唔係乜野勁, 我只係好有決心囉. 而且當我睇baby kingdom的forum時, 我呢d真係小巫見大巫, 佢地好多人都餵到bb兩三歲自然離乳, 我自問應該冇咁既恆心! 對於自己餵過左6個月, 已經好心滿意足了, 希望成功餵到最少1歲.
次餐: 而家已經俾糊仔粥仔境襄食啦, 境襄最鍾意食香蕉糊仔, 次次食到唔停咁! 另外我地有整過蘋果糊仔, 蛋黃糊仔, 南瓜粥仔, 蕃茄粥仔, 瘦肉粥仔咁, 境襄就對呢d一時時啦, 生果糊仔佢肯食, 其他粥仔就睇心情, 有時肯食晒, 有時只食幾啖! 境襄快d食到2餐粥仔代替人奶的話, 做媽媽的我就會越來越輕鬆!
牙仔: 到而家仲未出牙仔, 不過成日會咬野同勁流口水! 買左好多條口水肩啦~
笑聲: 已經成日keke笑, 我地成日引境襄笑, 因為佢如果開心keke笑的話, 我地聽得都會好開心!
發音: 有時都會發d類似mama baba dada的叫聲, 我覺得佢未真係識叫baba mama, 只係發音咁岩差唔多! 境襄你快d識叫mama, 記得要識叫mama先!! 嘿嘿
身體郁動: 已經識360度轉身, 最鍾意係換片時郁來郁去, 或者下身赤條條咁轉來轉去, 搞到條片成日都歪晒!!
腳仔已經好硬淨, 成日扶住佢行, 但當然未可以自己行到, 都未識得爬呢.
眼神: 最鍾意見到陌生人時超級眼定定望住人, 眼都唔眨, 抬頭定鏡望住, 好搞笑!
(閱讀全文)太快啦太快啦! 話咁快我就復工啦~ 番工時間bb要放喺婆婆屋企, 放工接番bb番屋企, 到第2朝番工前又將bb抱番去婆婆屋企, 預計會好累, 但好彩我地住得好近, 起碼唔駛舟車勞頓先.
之前呢2個月, 通常夜晚去完麻麻/婆婆屋企食完飯番屋企, 我都要餵奶同抱b氹佢瞓, 大約12點左右先可以做自己野, 沖得涼黎搞下呢樣搞下嗰樣就點幾兩點先瞓, 一晚大約瞓四五個鐘. 如果番工都係咁既節奏, 我真係會頂唔順, 希望bb乖d, 放落床唔好成日喊, 咁我就輕鬆好多!
後日就番工, 昨日去健康院上磅, oh no~ 重有成十斤肉喺身! 但我有bb前都已經肥左好多, 如果要keep番昔日的重量, 就要喊去十几斤肥豬肉先得! 不過餵人奶冇得減肥, 減左就會唔夠奶, 重要食多左好多野, 我而家有得身體自然瘦, 希望快d瘦番啦, d褲全部唔岩著, 我番工諗住著番條唔多覺係大肚褲的大肚西褲算啦, 費時買, 因已好難再買到岩我的size lu!!
(閱讀全文)
仲有兩星期就番工啦, 時間過得咁快架! 我算好彩啦, 最後放前0.5後9.5, 因為比預產期早左5日生, 就可以多d產假照顧bb.
昨日開始當番左工咁泵奶俾bb飲, 唔埋身餵, 因為bb同我要實習了. 本來plan每3個鐘泵一次, 但發覺原來好難, 本來預左幾點開始座熱支奶, 點知bb提早肚餓, 趕唔切座熱, 改左埋身餵, 咁就呢餐泵唔到, 同埋由於得我一個睇住bb, 有時剛剛想泵奶, bb又喊緊, 真係分身不暇, 所以昨日勉勉強強泵左2次.
今日就好d啦, 時間預得好左d, 可以泵到3次奶, 但係就隔左3.5小時先泵一次, 因為每次泵奶時, bb又係咁岩喊緊, 明明飲完奶都喊, 肯定係扭計扭抱! 不過我而家抱bb都習慣左, 所以可以邊抱邊泵! bb都幾搞笑喎, 我個電泵都幾嘈, 本來bb喊緊, 我開電泵咁嘈佢反而靜左, 之後仲瞓著左! 哈哈, 仲好, 咁我可以專心泵奶.
(閱讀全文)今年除左自己, 身邊好多朋友都大肚生bb, 有朋友同我只係相差一個月生bb, 有一個甚至只差2日, 感覺好開心, 因為可以一齊傾下bb經! 
我地傾計好得意, 次次都以sms聯絡, 可能因為大家都知道湊bb好忙, 為免打擾到對方, sms就最方便啦!
如之前個blog所講, 喺bb第1個月時, 我湊b湊得好辛苦. 媽媽會拎早午飯俾我我, 同埋幫bb沖涼, 而其餘時間就得我一個對住bb, 我都覺得自己好叻, 以前完全唔識湊bb, 抱又唔識抱, 換片都唔識, 而家竟然係自己湊!! 哈哈, 冇他, 煮到埋黎都要食! 所以每當我好累好辛苦時, 我都會sms俾我的朋友發洩一下!
不過, 身邊亦有朋友的bb健康未太理想, 需要做手術, 做父母的見到自己bb要受咁多痛苦, 真係好心痛. 之前報紙報導過一個孕婦因為飲含有三聚氰氨的牛奶而生了畸胎, 我自己好愕然, 愕然的原因係因為呢個孕婦竟然係我認識的, 我地未生之前仲成日傾大肚經. 突然間感覺好近, 非常為呢位媽媽難過. 亦有d好想生bb, 終於有bb但最後小產左. 原來生一個健健康康的bb唔係咁容易, 亦唔係必然的, 我好慶幸自己生左一個好健康的bb, 我希望bb將來都少病少痛, 最好無病無痛, 所以我盡我能力以人奶餵bb, 希望bb能夠健康成長.
(閱讀全文)
